Bengoren abesti berria
Aitor Bengoetxea BENGO Oiartzungo musikaria musika eszenara itzuli da ‘Beste Behin’ abestiarekin. Kantu horrek bide berri bat irekitzen du haren ibilbidean artistikoan eta bizitzan, eta datozen hilabeteetan entzungo denaren lehen zertzelada da. Aurten kaleratuko da bere disko berria, 2023an ‘Bizirik’ argitaratu eta gero.
‘Beste behin’ abestiak aurreko guztiarekin haustea dakar, eta musikariarentzat helduagoa eta pertsonalagoa den etapa bati ekitea. Julen Aduriz ekoizle gaztearekin batera, festan ibili den eta goizaldean etxera doan pertsona baten istorioa kontatzen saiatzen da Bengo. Kontakizunaren protagonista taxi baten barruan dago, eta abesti bat entzungo du, oso garrantzitsua izan zen norbait gogoraraziko diona. Etxera iristean, oroitzapen horrek oroimenean jarraitzen du, eta esan ezin izan zizkion emozio eta sentimendu guztiak oihukatzen ditu.
Abestiaren generoari dagokionez, hiriko poparen barruan sar daiteke, eta letra nostalgiaz josita egon arren, indarra transmititzen duten melodiak ere baditu, errepika batez ere. Horrek guztiak sentsazioen konbinazioa sortzen du, abeslariaren jarrera artistikoa argi eta garbi islatzen duena.
Kanta Julen Adurizek (Ergobia) ekoitzi du Oiartzungo lokal txiki batean, eta biek batera konposatu dute abestia. ‘Beste behin’ Eñaut Gaztañagak nahastu eta masterizatu du Gaztain Estudioetan (Zestoa). Rita Gratacósek (Bartzelona) zuzendu eta editatu du bideoklipa, eta Toni Llobetek (Bartzelona) grabatu.
